Inaasahang tataas pa ang bilang ng mga kaso ng leptospirosis sa mga susunod na araw matapos ang matinding pagbaha sa ilang bahagi ng Luzon dulot ng Super Typhoon Carina at ng pinahusay na Southwest Monsoon o Habagat, ayon sa Department of Health (DOH) nitong Huwebes.
Sa isang press conference, sinabi ni Health Secretary Ted Herbosa na ang incubation period ng leptospirosis ay limang hanggang labing-apat na araw, kaya’t inaasahan na magsisimulang tumaas ang mga kaso sa susunod na linggo.
“Dadami ‘yan, sinasabi ko sa inyo. Dadami ‘yan next week. At by that time, tsaka namin isa-set up ‘yung [leptospirosis] lane,” pahayag ni Herbosa sa mga mamamahayag.
Gayunpaman, ipinaliwanag niya na mas mahalaga kaysa sa pag-set up ng mga lane para sa leptospirosis sa mga healthcare facility ang pagpapakalat ng impormasyon kung paano makikilala, madiagnose, at malalapatan ng lunas ang sakit.
“Ang tubig baha ay madumi. Hindi dapat mag-swimming, hindi dapat siya gamiting swimming pool… Pagbawalan natin ang mga bata sa baha,” aniya.
Ang leptospirosis ay isang bacterial infection na naipapasa ng mga hayop gaya ng mga daga. Ang ihi ng mga nahawaang hayop, tulad ng mga daga, ay maaaring maghalo sa tubig baha sa panahon ng malakas na ulan, at maaaring makapasok sa katawan ng mga taong naglalakad sa baha.
Ang mga sintomas ng leptospirosis ay lagnat, pagsusuka, pagduduwal, pananakit ng kalamnan, at sakit ng ulo. May ilan ding kaso na nakakaranas ng kakaibang pananakit sa kalamnan ng binti at pamumula ng mga mata. Sa mga seryosong kaso, maaaring magdanas ng jaundice (pagkakaroon ng kulay dilaw ang balat), madilim na kulay ng ihi, maputlang dumi, mababang produksyon ng ihi, at matinding sakit ng ulo.
Hanggang Hulyo 13, may kabuuang 1,258 na kaso ng leptospirosis ang naitala sa bansa ngayong taon, kung saan 133 ang nasawi.
Ang mga sumusunod na rehiyon ang nagpakita ng pagtaas ng mga kaso ng leptospirosis mula Hunyo 2 hanggang Hulyo 13: Zamboanga Peninsula, Caraga, Soccsksargen, Western Visayas, Mimaropa, Eastern Visayas, at Northern Mindanao.
Photo Courtesy: Flood Water Walk